За нас

Акционерското друштво за приредување игри на среќа и забавни игри Лотарија на Македонија АД Скопје е основано со Закон за основање на организација за приредување игри на среќа, донесен од Собранието на Република Македонија на 28 Декември 1972 година. Лотарија на Македонија ја започна својата работа со 19 вработени, со изнајмени простории и со неколку свои локали.

Лотарија на Македонија до Мај 1992 година т.е. сè до монетарното осамостојување на Република Македонија беше здружена во заедница на Лотариските организации на Југославија, која ја сочинуваа: Лотарија на Србија, Лотарија на Хрватска, Лотарија на Црна Гора, Лотарија на Босна и Херцеговина, Лотарија на Косово и Лотарија на Војводина.

Постоеше единствено Југолотарија која ја организираше и координираше активноста на лотариските организации главно на заедничките игри на среќа.

Од почетокот на Мај 1992 година Лотарија на Македонија делува како Претпријатие кое исклучиво во сопствена организација и со сопствени средства ги приредува и оние игри кои порано се приредуваа на ниво на асоцијација на југословенските лотарии, и постојано внесува новини и иновации и го проширува асортиманот на игрите на среќа. Таа прерасна во своевиден гигант со преку 200 продажни места од кои половината се сопствени продажни објекти.

Во 1995 година Лотарија на Македонија е организирана како Акционерско друштво во мешовита сопственост.

Во 1997 година донесен е нов Закон за игрите на среќа, според кој требаше Лотарија на Македонија да изврши трансформација на општествениот капитал. Трансформацијата е извршена во 1998 година и извршен е упис во Трговскиот регистар.

Од првичните лозови, кои беа единствен асортиман, Лотарија на Македонија постепено го зголемуваше својот асортиман на игрите на среќа, за да покрај традиционалното Лото и Спортска прогноза, понуди разни видови инстант лотарии, Томбола ТВ Бинго, Спортски обложувалници, Автомати за игри на среќа и Играчница (Казино).

Така, во сегашниот асортиман на игри на среќа на Лотарија на Македонија се следните игри:

• Лото 7/37 (online) и Џокер
• Томбола ТВ Бинго
• Инстант лотарии: Хит+, Среќни ѕвезди, Рулет, Астро, Супер грепка, Изгреби Поло и Евро
• Обложување на спортски натпревари
• Игри на автомати за игри на среќа
• Играчница (Казино)

Управувањето со Лотарија на Македонија АД Скопје се врши преку едностепен систем со Одбор на директори составен од 5 члена.

Структура на друштвото:

• Генерален извршен директор
• Заменик генерален директор
• Помошник директор
• Сектор за општи игри на среќа
• Сектор за финансиски работи
• Сектор за посебни игри на среќа
• Сектор за општи и правни работи
• Сектор за продажба
• Сектор за информатика
• Сектор за маркетинг

Во моментов Лотарија на Македонија АД Скопје има 213 вработени.
Лотарија на Македонија од самиот почеток на нејзиното формирање па се до денес дава огромен придонес во развојот на Македонскиот спорт и култура, бидејќи средствата што се прибираат од игрите на среќа се користат за финансирање на одредени годишни програми и задачи на здруженија на граѓани, програми на Здруженија на хендикепирани лица, Црвениот крст, потоа се финансира Агенцијата за млади и спорт, односно се финансира врвниот и масовниот спорт.

Лотарија на Македонија е членка на WLA (Светската асоцијација на лотарии) и EL (Асоцијација на европски лотарии).